نص مسرحي العرائس: " أراجوز و أراجوزتا " / تأليف وأشعار: سعيد حجاج

الفصل الاول
 
المشهد الاول
 
(خشبة مسرح بسيطة عليها شاشة خيال الظل، بارفان للأراجوز على اليسار …  يظهر الاراجوز وزوحته اراجوزتا  ويغنيان مع موسيقى الليلة الكبيرة .. حتى نصل إلى جزء الليلة السيرك تعالوا .. زئير أسد ثم اراجوزتا زوجة الا راجوز والتي تعمل معه في السيرك  تندفع بظهرها تسقط أمام الجمهور كممثلة بشرية بنفس ملابس اراجوزتا .بنما يختفى الاراجوز من البارافان) .
أراجوزتا: (تفيق ثم تنظر حولها بدهشة) آه يا ضلوعي..أه..أه أنا فين أنا بحلم ولا إيه؟ إيه اللي حدفني هنا أه..أه . كل اللي فاكراه أن أنا وسى اراجوز جوزى كنا في خيمة السيرك بنقدم فقرتنا..أيوه افتكرت..الاسد هب في وشي هبه نطرتني حته نطره.. اين النطرة جابتني هنا.. أه ياني يانى يانى .
(يندفع اراجوز من من باب قاعة المسرح بظهره .. يسقط بجانب أراجوزتا)
أراجوزتا: (تعمل على افاقته) جوزى ..اراجوزى .. حبيبي .. فوق . أصحى ..
اراجوز: إيه ده ؟ إيه اللي حصل ؟ (ينظر لآراجوزتا فيصرح) لا لا .. الاسد .. لا لا
أراجوزتا: أنا أسد ياللي معندكش نظر. داهية تاخد ملافظك .
اراجوز: مين اراجوزتا جوزتى ..معلش أصل كنت بعمل فقرة البلياتشو بتاعتي راح الاسد هب فيا اتنطرت لقيت نفسي هنا .. الا احنا فين ياراجوزتى ياجوزتى .؟ ! متعرفيش؟
أراجوزتا: انطس في نظري لو كنت اعرف
اراجوز:. ده مكان عجيب قوي عمري ما شفت زيه قبل كده ولا في الحوايت
أراجوزتا: انا خايفة يااراجوزى ياجوزى
اراجوز: متخوفنيش بقه انتي كمان..وخلى قلبك جامد. ماتبقيش جبانه كده (وهو يرتعش)
(فجأة تدخل من باب قاعة المسرح اربعة عرائس (ممثلين) غريبة الشكل كالكائنات الفضائية  وبينما أراجوز وأرجوزتا في دهشة نجد العرائس تغني ..

توت .. توت .. توت

هنا هنا دنيا الحواديت

هنا هنا مملكة الاحلام

توت .. توت .. توت

 فتح عينك شوف قدامك

واوعى لعينك لحظة تنام

لا القطر بحكاياته يفوت

توت .. توت .. توت

عروسة 2: ايه اللي جابكم هنا وازاي وليه ؟
اراجوز واراجوزتا: م .. م .. م ..منعرفش
عروسة 1: واحد بس اللي يتكلم
اراجوز واراجوزتا: اصل .. اصل الحكاية أن أحنا الاثنين كنا في السيرك وبعدين …..
عروسة 2: قلنا واحد بس اللي يتكلم
اراجوز: يبقى أنا اللي هاتكلم
أراجوزتا: لأ .. أنا اللي هاتكلم
اراجوز: أنا الراجل
أراجوزتا: دلوقتي بقيت راجل
عروسة 1: اسمعوا .. احنا مش فاضيين .. احنا ورانا حواديت كتير .. واحد بس اللي يتكلم ..هو ده الادب واصول الحوار
عروسة 2: واحد بس اللي يتكلم علشان ندلكم على اللي انتم عايزينه ونمشي وتمشوا انتوا كمان  في سلام .
عروسة 1: صح الكلام؟
أراجوزتا: خلاص .. اتكلم أنت الأول يا اراجوزى ياجوزى
اراجوز: لا .. اتكلمي أنتي الأول … ليدس فيرست هى دى الاصول .
أراجوزتا: الهي اعدمك تتكلم انت الاول.
اراجوز: يارب اشوفك مسخوطة قرد تتكلمي انتييييييييييييي ….. الاول
عروسة 2: (تقاطعه) برضه ما بتسمعوش الكلام! طيب..لانكم رغايين ومابتسمعوش الكلام ولا بتعقلوه ولابتوزنوه ..
عروسة 1: هنحكم عليكم تدخلوا دنيا الحواديت من اوسع باب
عروسة 2: باب الحلم
أراجوزتا: حلم ! انتم هتنيمونا ولا إيه !
عروسة 2: الحلم يعني التأني .. يعني التروي
عروسة 1: يعني التفكير قبل الحكم على اي حاجة
اراجوز: ولما نتمسك جوه بقى .. يبقى أزاي الحال !
أراجوزتا: أكيد مش هيرجعونا.
عروسة 2: ماحدش هيشوفكم هناك .. لانكم من زمان غير الزمان
عروسة 1: ومن مكان غير المكان
عروسة 2: بس خلوا بالكم من الاشرار
اراجوز: هي دنيا الحواديت كمان  فيها أشرار ؟
العرائس: ولا كلمه..حكمنا عليكم تدخلوا دنيا الحواديت. من غير كلام ولا حتى سلام .وابقوا ورونا بقى شطارتكم وهاتعملوا ايه هناك . خصوصا انكم هناك لاحد هايشوفكم ولا حد ممكن يسمعكم .

اظـــــــــــــــــــــــلام

المشهــــد الثانــــــى

أراجوزتا: الله الله . إيه ده انت صغرت كده ليه ؟
اراجوز: هو ايه اللي بيحرى لنا ده؟
أراجوزتا: ماليش دعوه انا عايزه أرجع زي ما كنت كبيرة .
اراجوز: يعني هعملك ايه مانا اتنيلت زيك اهه وبقيت قدك بالظبط اهو .
أراجوزتا: اتصرف انت  بقى.. مش انت الراجل؟
اراجوز: دلوقتي بقيت انا الراجل ؟
أراجوزتا: اتصرف بقه بلاش غتاتة. شوف بقى الموضوع ده انا خايفه ومش هاقدر استنى غير لم اعرف انا فين بالظبط؟
اراجوز: انتوا ياللي هنا.. ياناس ياهو .. حد يرد علينا .
اراجوز واراجوزتا: حد يرد علينا.
(دخان مع اضاءة تعبر عن الخوف مع جملة موسيقى مفزعه حيث يظهر السحرة الاشرار وامامهم شاشة خيال ظل  مستديرة كما البللورة المسحورة . واراجوز واراجوزتا يراقبون ما يحدث)
ساحر 1: الملك طرد ونفى مننا احنا السحرة اعداد كبيرة برة البلاد وشردنا
ساحر 2: من غير ما نعمل شر ولا نأذى حد حتى .
ساحر 3: لازم نخطط ونتكتك لغاية ما ناخد بتارنا من الملك ونرجع مكاننا تاني
ساحر 2: بس ازاي هه؟
ساحر 1: اول حاجه نعملها لازم نتجسس على الملك ونعرف اخباره عشان نقدر ندبر خطة نقضي بيها عليه
ساحر 2: بس ازاي هه ؟
ساحر 1: كلامك مظبوط ياله بينا نشوف الملك بيعمل ايه دلوقتي
ساحر 2: بس ازاي هه ؟
ساحر 3: هو انت مش حافظ غير الجمله دى وبس ؟هشش اسمع وانت ساكت ..
السحرة: يازمبلك يازمبلك .. ودينا حالا  لقصر الملك
(تفييد الإضاءة إلى شبه إظلام على السحرة .. لنرى البلورة السحرية امامهم يظهر فيها الملك كعروسة خيال ظل) .
ساحر 1: (وهو ينظر إلى البلورة) الملك اهو..الملك اهو في البلورة السحرية..تعالوا يااخواني السحرة بصوا
ساحر 3: بيعمل إيه ؟
ساحر 1: اهو قدامك اهو ؟
(تتسع دائرة الزووم ” البلورة السحرية ” فيظهر الملك وهو نائم على سريره في نصف الشاشة الأيمن بينما دائرة زووم أخرى على السحرة).
الملك: (يصحو مفزوعاً من نومه ) يا حراس المملكة .. يا حراس ..
الحارس: نعم يا سيدي
الملك: صبوا على وجهي مسك وريحان وابعتوا نادوا على حكماء المملكة تفسر لي الحلم الرهيب .. آه .. آه دوروا في طول المملكة وعرضها  وهاتى الحكما كلهم .
الحارس: في الحال هيكون عندك اللي يطمنك ويفسر حلمك يامولاى الملك .
(دخان ننتقل الى السحرة)
ساحر 1: الملك بيصرخ ويستغيث
ساحر 2: بس ازاي هه ؟
ساحر 3: انت ساحر ولا عبيط انا مش فاهمك خالص . ده بيطلب انهم ينادوا في طول المملكة وعرضها على اللي يفسر له حلمه يبقى لازم نسبق الحكماء على قصر الملك
ساحر 1: نلبس ملابس الحكماء  ودقون الحكماء ونفسر له حلمه على هوانا ونبلغ مرادنا ومنانا
ساحر 2: بس ازاي هه ؟
(السحرة الثلاثة يقومون بعمل بعض الطقوس السحرية وأمامهم إناء يتصاعد منه الدخان)
السحرة: حشتوك يا بشتوك يا ابو السباع بحق الشاي والقرفة والنعناع ودينا قصر الملك الخداع
(دخان .. يختفي السحرة .. يخرج اراجوز واراجوزتا بخوف)
اراجوز: سمعتي يا اراجوزتا؟
أراجوزتا: ايوة .. يااراجوزى ياجوزى .. انت سامع كمان الموضوع الخطير اللى بيحصل حوالينا ؟
اراجوز: ايوه سامع وخايف من اللى هايعملوه الاشرار دول فى الملك الطيب ده ؟ انتي ايه رأيك دلوقتي؟
أراجوزتا: في ايه ؟
اراجوز: في اللي شفناه وسمعناه من السحرة الاشرار .. نقول للملك عليه ونكسب ثواب ولا نطنش ونعيش وناكل قراقيش ؟
أراجوزتا: انا من رأيى نطنش ونعيش وناكل قراقيش .ماتبقاش متسرع وتودى نفسك للتهلكة .
اراجوز: لا ازاى الكلام ده؟ انتي مش  سامعهم بيقولوا التار والنار وينتقموا من الملك ؟ والملك ده باين عليه طيب..يبقى ضروري نحذره..ولا ايه رأيك ناخد راى الاولاد الحلوين دول؟ ايه رأيكم بقى نحذر الملك ولا ننجى بارواحنا ونطنش ونعيش ؟
أراجوزتا: وناكل قراقيش .؟
(يحدث جدل بين الاراجوز واراجوزتا ويمكن ان ينزلوا وسط الاطفال لأخذ الاراء  حتى يستتب الامر  بان يذهبا ا الى قصر الملك.)
اراجوز: يبقى نتوكل على الله ونروح على قصر الملك .
أراجوزتا: يارب ياساتر .. يلا بينا .

اظـــــــــــــــــــــــلام

                 الفصل الثانـــــي

 
المشهد الثالــــث
( ينتقل الاراجوز واراجوزتا الى قصر الملك الفخم الضخم حيث حجرة نوم الملك  ويقتربان منه )
أراجوزتا: (تقترب من اذن الملك) يا مولاي الملك .. ده مش سامع ( في اذنه ) تووووووت
اراجوز: ده مش سامعك خالص .. تلاقيه سرحان ولا نايم (في اذن الملك) انت يامولانا فوق الله يخليك .
أراجوزتا: يا حضرة الملك يا مستر ملك يا ملك بيه ده ياين عليه اطرش .
الحارس: ( صوت الحارس من الخارج ) الحكماء الثلاثة يا مولاي
الملك: خليهم يدخلوا بسرعة.
الحارس: امر مولاي.
اراجوز: يا نهار اسود..احنا لازم نستخبى بسرعة احسن حد يشوفنا. تعالي يا اراجوزتا نستخبى وراء الستارة دي احسن حد يشوفنا
(يختفيان خلف الستارة السوداء وراء كرسي الملك ويظهر جزء منهما كعرائس اراجوز فقط  بعد لحظة يدخل السحرة الثلاثة )
ساحر 1: احنا تحت امر مولانا الملك المعظم.
الملك: انتوا طلبتم تقابلونى ليه ؟
ساحر 2: احنا يامولاى  حكماء مكشوف عنا الحجاب ونقدر نعرف ايه اللى شاغلك ومطير النوم من عينيك وعلشان كده احنا جيناك عشان نقولك شوفنا ايه؟ شفنا في المنام ان مولانا مفزوع وحزين من كابوس رآه
ساحر 3: قلنا نيجي ندلك على تفسير الكابوس ونرشد مولانا للصواب وندل خطاك على اللي يريح بالك
السحرة الثلاثة: احكي لنا الكابوس يا مولانا؟
(الملك يحكي والحلم يتجسد عن طريق العرائس خيال الظل فى شاشة خلفية)
الملك: حلمت إن فيه سمكتين لونهم أحمر بيرقصوا حواليا وهما واقفين على ديلهم .. وبعدين جت وزتين وطاروا حوالين راسي .. وبعدين الوزتين دول وقعوا قدامي .. جه بعد كده تعبان كبير وقرصني في رجلي والدم غرق جسمي .. بعد كده طلعت على جبل ابيض خلصني من كل اللي شفته.
ساحر 2: بس ازاي هه؟
ساحر 3: (يلكز ساحر2 ) اسكت انت خالص ماتنطقش . شكلك هاتودينا فى داهية . شوف يامولاي تفسير حلمك إنك لازم تخلص على حميع احبابك علشان يدوم ملكك .. وتفضل عايش سعيد
الملك: وهو اللي يعمل شر في احبابه يقدر يعيش سعيد إزاي بس؟
ساحر 1: عشان ملكك يطول  يبقى  لازم تحقق تفسير الحلم يامولاى.
الملك: ومين احبابي دول اللي عاوزني اخلص عليهم . واخلص منهم .
ساحر 3: اولا زوجتك .. عين الحياة.
الملك: مستحيل .. الملكة عين الحياة هي النسمة الجميلة في حياتي . هي روحي اللي عايش بيها والنفس اللى داخل جوايا ولو طلع مش راح تنكتب لى حياه .. علشان كده انا سميتها عين الحياه .
ساحر 1: عين الحياة لازم تموت فدا ليك ولعرشك  ياملك البلاد
الملك: ومين كمان ؟
ساحر 1: وابنك الامير الكبير .. اعز ولادك
الملك: ابني الكبير  الامير ..مستحيل ده وريثي على عرش المملكة. ولو قتلته يروح لمين عرشى وتاجى .
ساحر 1 و 3: لازم تنفذ الاوامر يا ملك البلاد
الملك: ومين كمان؟
ساحر 3: وكاتم سرك الوزير دهمان
الملك: دهمان ؟  ..كمان ؟
ساحر 1: وكمان تخلص من الحكيم عمران
الملك: لا لا .. مش ممكن .  انتوا اكيد مجانين ؟
ساحر 2: وفرسك الاسود وفيلك الابيض .
ساحر 1: وتحط دم كل دول في حوض كبير وتستحمى فية
ساحر 2: ولما تخرج من الحوض الكبير ننشفك من الدم ونطهرك بالميه والملح وتدخل قصرك وتحفظ عرشك ويدوم ملكك يامولاى .
الملك: واذا ما نفذتش كلامكم المجنون ده .. ايه اللى راح يحصل وايه اللى راح يكون ؟
ساحر 1: الحلم هيتفسر ويزول ملكك وتهلك البلاد من بعدك .
ساحر 2: بس ازاي هه ؟
الملك: ياويلي ياويلي ..  (يخرج مفزوعا ويصرخ)
ساحر 1: هو ده الكلام والا بلاش .  الملك لو صدق كلامنا وعمل اللى شورنا بيه عليه نقدر ساعتها نعمل اللى يقدرنا عليه الشيطان .
ساحر 3: الملك كده هيبقى وحيد .. ونستفرد احنا بيه .. ونتحكم في العرش .
ساحر 1: نحكم على  مزاج مزاجنا ونخلي الشر يسود العالم . والخير ينطرد برة البلاد
ساحر 2: بس ازاي هه ؟
(يضحكان يخرجان .. يخرج اراجوز واراجوزتا بهدوء وخوف ويظهران كبشريين)
أراجوزتا: سمعت الكلام اللي يسيب الركب ده  ياجوزى يااراجوزى ؟
اراجوز: سمعت وشفت يا  يااراجوزتى ياجوزتى .. بس هنعمل ايه  . ؟ واحنا لاحد قادر يشوفنا ولاعارف يسمعنا
أراجوزتا: نقول للملك على شفناه وسمعناه.
اراجوز: شوف الذكاء يااولاد .. ياولية باقولك ماحدش هايقدر يشوفنا ولا يسمعنا لأ اننا من زمان غير الزمان ومن مكان غير المكان.
أراجوزتا: يبقى ننده على اصحابنا العرائس يمكن يقدروا يساعدونا . يااصحابنا الطيبين .. احنا فى ورطة مايعلم بيه الا ربنا وعاوزين حد يساعدنا .
العرائس: (فجاه تدخل) احنا في الخدمة . مين اللى نده علينا .
أراجوزتا: ايه ده .. جيتوا بسرعة ليه كده؟
عروسة 1: احنا نقدر نحس بيكم أول ما تفكروا فينا مش كمان تندهونا ؟
اراجوز: والله العظيم انتم ولاد حلال مصفيين..احنا كنا عايزنكم علشان تخلونا نعرف نحذر الملك ونقول على اللى ناويين عليه الاشرار دول .
عروسة 1: احنا مانقدرش نعمل كده؟
أراجوزتا: ليه ماتقدروش تعملوا كده .
عروسة 2: لانكم في دنيا الحواديت لا حد يقدر يشوفكم ولا يسمعكم .
اراجوز: احنا عارفين الكلام ده .. بس انتوا لازم تتصورفوا ..لازم تساعدونا علشان نقدر نساعد الملك وننقذ البلاد والعباد من الهلاك .
عروسة 1: إزاي نقدر نساعدكم.
أراجوزتا: خلي الملكه والوزير يشوفونا ويسمعونا
اراجوز: ونحذرهم ونكشف ليهم خطة السحرة الاشرار
أراجوزتا: والملكة والوزير يحذروا الملك .
عروسة 1 و 2: احنا موافقين رغم ان الموضوع صعب لكن ممكن نحاول سوا.. ياله حطوا ايديكم في ايدينا ..
اراجوز واراجوزتا: حطوا ايديكم في ايدينا ..

ايد على ايد على ايد

يتلم الشمل وقوتنا تزيد

يوصل صوتنا

بره حدودنا

وقلبي وقلبك

يبقى حديد

بره كمان دنيا الحواديت

نبقى جماعه

زي الساعة

لامره تقدم

ولا مره تاخر ياجماعه

ولا حد يهوب قلب بلدنا

ويفضل جوه بلدنا العيد

احلى من احلى الحواديت

ايد على ايد على ايد

يتلم الشمل وقوتنا تزيد

اظـــــــــــــــــــــــلام

 
 
المشهد الرابـــع
(بعد الغناء ينتقل المشهد الى القصرداخل القصر لنرى احدى القاعات)
الوزير: الملك اليومين دول بقيت احواله غريبه وعجيبة ومايعلم بيها الا علام الغيوب .
الملكة: ايه السر في كده ياوزير ؟ انا بقالى فترة طويله محتارة فى امر الملك ومش عارفه ايه اللى شاغل باله وتاعب قلبه  بالشكل ده .
الوزير: هو ده اللى لازم تعرفيه بنفسك .. ادخلي له يامولاتي شوفي ماله وايه اللى جراله .
الملكة: وفكرك هيقولي على اللي مزعله ياوزير ؟
الوزير: الملك طول عمره بيقول إن مافيش هم جالي وشفت الملكة عين الحياه الا وزال همي  وراح غمى .
(يدخل اراجوز واراجوزته)
أراجوزتا: مولاتي .. مولاتي
الوزير: انتوا مين ؟ وايه اللى جابكم هنا ؟ ياحراس ياحراس ,.
اراجوز: اصبر بس ياعم الوزير ماتتسرعش كده وتضيعنا وتضيع روحك والمملكة كلها .انا اراجوز وديمراتى  اراجوزتا
الوزير: يعني ايه اراجوز ويعنى ايه اراجوزتا؟ . .. ايه اللي جابكم هنا ؟.
أراجوزتا: طب نقوله ايه الأخ ده . احنا جايين علشان نساعدكم يامولاى ونطرد الشر برة المملكة .
الوزير: انتوا باين عليكم نصابين .. انا  هااخلى الحراس يقبضوا عليكم ويعرفوكم مرار السجن  .. ياحراس .. ياحراس .
اراجوز: لا لا .. انت مش واخد بالك يامولاي .. إحنا عارفين ايه اللي مزعل مولاي وجايين نعرفكم ونحذركم من اللى طلبوه الاشرار من مولاكم الملك .
الملكة: لحظه ياوزير .. انتظر .. لعل فى وجودهم يكون الخير .  انتوا قصدكم إيه بالأشرار؟
أراجوزتا: السحرة الاشرار يامولاتي
الملكة: سحرة .. انا مش فاهمه اى حاجه من كلامكم ولا عارفه تقصدوا ايه بالكلام الغامض ده .
اراجوز واراجوزته: نفهمك يامولاتي .. تعالي يامولاتي هاتي ودنك هات ودنك ياوزير وش وش
(يوشوشونهما بينما تتصاعد الموسيقى وتظهر علامات التعجب على وجوه الوزير والملكه)
الملكة: اعوذ بالله من الشيطان الرجيم ومن الشر المقيم .
الوزير: طب والعمل يامولاتي  دلوقت ؟
الملكة: تعالى ياوزير معايا  .. وانتوا خليكم هنا راقبوا المكان من غير ماحد ياخد باله منكم .

اظـــــــــــــــــــــــلام

 
 
المشــــهد الخامـــــــس
(.. ينتقل المشهد الى قاعة العرش حيث تدخل الملكة والوزير على الملك )
الملك: ايه اللي جابكم هنا.؟ ومين اللى امركم بالدخول .. انا قايل للحراس مافيش حد مسموحله يعتب قاعة العرش ابدا ولو حتى كانت الملكه عين الحياه .
الملكة: احنا جايين نسالك ايه خلاك حزين مكروب يامولاى . وايه اللى طير النوم من عيون مولاى .
الملك: متسالنيش ياعين الحياة .. قلبى مليان كلام لااقدر اقوله ولا حتى اصرح بيه . ولا حتى ممكن يظهر فى عيونى .. الأمر جلل ياعين الحياه .
الوزير: ليه بس يامولاي يمكن نقدر احنا نساعد ونزيل من قلبك اللى كابس عليه  .
الملك: الحزن اللي في قلبي اكبر بكتير من مساعدتكم ليا . وحتى اكبر من مساعدة حكيم الحكماء؟
الوزير: فرق حزنك علينا وبوح باللي في قلبك يا مولاي
الملك: الحكماء فسروا حلمي تفسير غريب مفزع رهيب واللي طلبوه مني مخيف ماقدر اقوله ؟
الملكة: طلبوا منك ايه يامولاي
الملك: لا لا انا مااقدر ش اقوله  لأنى لو قلتوا اكيد هايتفسر الحلم .لا لا  .. طلبوا مني ..  لا لا .. مقدرش مقدرش اقولكم
الوزير: طلبوا منك تتخلص من أقرب الاقربين ليك. مش كده ؟
الملك: وانت عرفت ازاى الكلام ده ياوزير ..؟عرفت ازاي ومنين ؟
الملكة: مش مهم عرفنا منين وازاى .
الملك: طب والحل
الوزير: متصدقش اللي فسرولك الحلم دول
الملك: دول حكماء
الملكة: متصدقهمش يامولاي دول سحرة اشرار
الملك: قصدك ايه؟
الوزير: قصدها يا مولاي .. ان اللي قالك الكلام ده لا يمكن يكونوا حكماء .. لان الحكيم دايما بيطلب الخير
الملك: مش فاهم ؟
الملكة: فاكر يامولاى  السحرة اللي طردتهم من المملكة زمان دول بقى احفادهم  .. اتخفوا وعملوا حكماء.
الملك: الملاعين .. وايه العمل  طب الحقوهم احسن يهربوا من المملكه وبرة الحدود . .. دبروني وخلوا الحراس يمنعوا هروبهم.
الوزير: نبعت للحكيم عمران .. يفسرلك حلمك
الملك: ياحراس
الحارس: أمر امولاي
الملك: حالا تبعتوا تجيبوا الحكيم عمران
الحارس: سمعا وطاعه يامولاي

اظـــــــــــــــــــــــلام

 
المشــــهد الســادـس
(قاعة العرش الملك يروح ويجئ في قلق يدخل الحارس)
الحارس: الحكيم يامولاي.
الملك: خلوه يدخل حالا .
الحكيم: السمع والطاعه لملك البلاد والعباد
الملك: اتفضل ياحكيم
الحكيم: ما الذى الم بك  ايها الملك؟
الملك: شفت ياحكيم حلم عجيب
الحكيم: ان شئت  يامولاي تحكيلي الحلم .
الملك: انا حلمت
(الملك يحكي الحلم بانتوميم بينما نرى مايجكيه على شاشة خيال الظل مع تصاعد الموسيقى وتتداخل تفسير الحلم مع كلام الملك).
الحكيم: شوف يامولاي .. السمكتان الحمراوان .. معناهم ياتيك رسول من ملك الهند بعقدين مرصعين بالدر والياقوت .. واما الوزتان فانه ياتيك رسول من ملك السند بحصان اصيل ليس على الارض له مثيل اما الثعبان فانه ياتيك من ملك فارس رسول يحمل سيفا من الذهب الخالص لتحصد به رؤس الاشرار .. أما ما رايت من غرقك في الماء فانه ياتيك رسول من  ملك التركمان يثياب فخمه لم يرتدي احد مثلها من قبل .. اما الجبل الابيض فهو فيل ياتيك وحده ماشيا من افريقيا وهو فيل سريع اسرع من الخيل
الملك: ماكانش لازم احزن طول مافي البلاد حكيم في مثل حكمتك وعلمك ياحكيم عمران
الحكيم: الشكر لله يامولاي
الملك: دخلوا عليا بالمكر والحيله
 الحكيم: هم بلا شك السحرة الملاعين
الملك: صحيح ياحكيم .. لكن الوزير اشار عليا مشورة تخليهم ييجوا لحد هنا
الحكيم: بما اشار الوزير يامولاي
الملك: اني اطلع منادي القصر .. يعلن في المملكة اني اتخلصت من احبائي وعزوتي .. وساعتها هيفتكر السحرة اني بقيت وحيد .. وساعتها هيجوا هنا برجليهم
الحكيم: نعم الراي يامولاي
(اظلام .. ثم قاعة العرش .. الحارس ممسكا بالسحرة واراجوز وارجوزته)
الملك: ايه اللي بيحصل ده
الحارس: دول السحرة الاشرار يامولاي .. ودول لقيناهم في القصر
الملك: انتوا مين
اراجوز وارجوزته: احنا اتنين بني ادمين دخلنا دنيا الحواديت
الملك: دخلتوا دنيا الحواديت ؟
ارجوزته: ايوة يامولايا عشان نحذرك من السحرة الاشرار
الملكة: ( الملكة مع الوزير يدخلان ) تمام يامولاي .. دول اللي حذرونا وكشفوا لنا خطة السحرة
الوزير: تمام كده يامولاي
الملك: السحرة الملاعين دول تعلقوهم احياء على باب القصر
(يخرج الحراس مع السحرة)
اراجوز: واحنا هتعمل فينا ايه يامولاي؟
الملك: انتوا هتفضلوا معانا هنا في القصر ضيوف
ارجوزته: شكرا يامولاي احنا عايزين نرجع لبلدنا وزمانا تاني
الملك: طلبكم مجاب بس مش قبل ما تحضروا معانا الافراح واليالي الملاح
(استعراض يغني فيه الجميع مع العرائس عن الحب والخير).

اظــــــــــــــلام