نص مسرحي: ” راجل و2 ضراير” / تأليف : محمد الشرقاوى ( شكوكو )
المشهد الأول
(يضاء المسرح وهو عبارة عن بهو كبير في فيلا (ادهم ) يوجد انتريه على اليمين وعلى اليسار كرسيين صالون وفى العمق تربية عليها فازهبيه ورد وعلى الحائط صورة ادهم. صوت كريمة الشغالة قادم من الداخل تنادى على محروس الخادم)
كريمة: أنت فين يا محروس؟ يا محروس أنت فين؟ (تدخل المسرح وفى يدها فوطة ومقشة) أنت فين يا محروس؟
محروس: (صوته من خارج المسرح) هنا اهو جاى حلا (يدخل إلى المسرح وفى يده صيني) فيأيه؟ يا محروس يا محروس. هو انا في بلد ثانية ولا إيه ما إنا معاكى هنا اهو
كريمة: كنت فين؟
محروس: كنت بطلع الفطار للبيه فوق. مالك؟
كريمة: (في دلال) اصلك وحشتنى
محروس: وحشتك بجد
كريمة: ايوة
محروس: ما إنالسه سيبك حلا
كريمة: بتوحشنى وانت أصادعيني ياحبة عينى
محروس: ياه .. بتجبينى للدرجة دى؟
كريمة: واكتر شوية.. كنت عايزة منك حاجة.. وخايفة تكسفى
محروس: كمعاش ولا كان اللي يكسفك. اامرينى ياحبت عينى
كريمة: لاء هتكسفنى
محروس: قولى بس وعمر ماهكسفك
كريمة: كنت عايزة.. لاء خايفة اقولك..
محروس: قولى .. وانا اموت نفسى واعملك اللي عايزاه.
كريمة: أنت عارف دولاب المطبخ
محروس: اها عارفة..
كريمة: في خمسة كيلو رز عايزاك تنقيهم..
محروس: رز .. وانا اللي فاكرك عايزة.. طب حاضر عنية..
كريمة: وتروح تشترى الخضار واللحمة وتنظف البيت وتنظف الجنينة وتعملى شاى وتضبخ الغدا.. وبس
محروس: ما احمى الكلاب بالمرة
كريمة: كدة .. مش قلتلك مش هتوافق؟
محروس: أنا اشيل الهرم على دماغى علشان خاطرك حاضر بس كدة؟
كريمة: لاء في
محروس: فيأية تانى؟؟
ادهم: (صوته من خارج المسرح يصيح بصوت عالي) خلاص إنا تعبت جبت اخرى ما بقتش قادر على العيشة دى ( يدخل إلى المسرح مندفع وهو غاضي يالسروال وفانلة حملات) خلاص أنا تعبت جبت اخرى ما بقتش قادر على العيشة ..تعبت..
محروس: مالك يا ادهم بية؟؟
كريمة: في إيه يا بيه؟؟ هو كل يوم على الموال دا؟
ادهم: مش عايز اشوف حد.. برة اطلعوا برة..
(تخرج كريمة ومحروس بسرعة من على المسرح)
ادهم: خلاص تعبت من كل حادة من العيشة واللى عيشنها.. أنا خلاص هسيب البيت ( احد يرمى له ملابسه في الصالة قمصان مناطيل جواكت يرى هذ.. يجرى على الملابس يلمها من على الارض) هو انتى كل مرة ترمى هدومى على الارض ولا ايه؟ ( يقف ويرتب جميع ملابسه.. يفكر.. يصيح) لسه فاضل (لا يكمل كلامه يتحدف علية ملابسه الداخلية.. يعدها كل طقم لوحده.. يوجد فانلة فقط بدون شورط.. يهم بالصياح يرمى عليه الشورط على وجة.. يمسكه) ايوة كدة مش كل مرة اسبلك طقمين
(يتحرك ويجلس يدخل محروس كريمة إلى المسرح)
محروس: تسمحلى اتكلم؟
ادهم: عايز تقول ايه؟ اتكلم؟
محروس: هو حضرتك من يوم ما اتجوزت على الحال دا
كريمة: ايوة وكمان بيترمى هدومك في وشك
محروس: هو حضرتك مش قادر عليها ولا ايه؟
ادهم: أنا مش قادر.. لاء أنا اقدر على الف ذيها.. هى مفكرة نفسها إيه؟
كريمة: اهدى لا تسمع صوتك يا بيه
ادهم: ما تسمع هو أنا بخاف؟
(صوت حنان من خارج المسرح..تنادى على كريمة)
حنان: كريمة هاتيلى الفطار..ومين اللي صوتوه عالى عندك ده؟
كريمة: لاء دا الاستاذ..(يشدها ادهم من يدها كى لا تقول اسمه) دا محروس يا مدام حنان.
حنان: هو عنتر عندك ولا خرج؟
(عندما يسمع ادهم هذا ياخذ ملابسه ويخرج مسرعا من المسرح .. تدخل حنان المسرح تنظر يمين ويسار لا تجد ادهم)
حنان: هو عنتر خرج؟
(تخرج كريمة وخلفها محروس من المسرح.. تحدث حنان نفسها بصوت مسموع)
حنان: عمرى ما فكرت ان يوصل بينا الحال أنا وادهم للمرحلة دى.. ايام الخطوبة ما كناش كدة ابدا.. كان ديما يخاف علية وعلى زعلى على طول كان بيجبلى احسن هدايا واشك لبس..كانت كلمة بحبك دى على طول يقولها لما كنت بزعل ما بيبقاش عارف يعمل أية على شان يرضينى.. كان احن عليه من اى حد في الدنيا كان احن عليه من نفسه.. مش عارفة أيه اللي حصل كل يوم زعيق وخناق على الفاضية والمليانة هو أية اللي حصل؟
(تدخل كريمة إلى المسرح وهى حاملة على يدها صينية افطار شاى وبسكويت..تسمع حنان وهى تحدث نفسها)
حنان: حتى إنا مش عارفة أية اللي حصل ليه؟ مش طايقة اشوفه قدامى وهو ديما يتخانق معايا.. سعات بحس انى محتاجاه ومش قادرة استغنى عنة فجأة نتخانق، في أية مش عارفة؟
كريمة: عين وصبتكم يا ستى انتى معملك عمل
حنان: عمل أيه انتى كمان؟
كريمة: صدقينى كانت مرات اخويا كده واكتر لدرجة انها ضربته بالسكينة لولا ستر ربنا
حنان: أيه. و.بعدين أيه اللي حصل؟
كريمة: عمنلها زار بقوا احسن من الأول ودلوقنى عايشين ذى الفل
حنان: زار أنا اعمل زار معقولة دا كلام فارغ .. بقولك أية اطلعى برة برة
( تخرج كريمة من المسرح حنان وحدة تشرب في الشاى تحدث نفسها بصوت عالى)
حنان: زار أنا اعمل زار خليت أية للجهلة مش معقول .. ابدا ابدا (يدق جرس التليفون، ترد عليه) الو، الو، الووووو.. ما تردى يا هانم ردى أنا عارفاكى ومش هاخليكى تنتصرى عليه الوووو ..ردى ردى (تغلق التليفون..بعصبية.. يكون ادهم واقف بحيث لا تراه )
أدهم: أنا عارف مين بيتكلم اللي دايما يكلمها في نص الليل أنا مش ها خليها تنتصر عليه
( يدخل ادهم ويجلس..عندما تراه تصيح في وجه)
حنان: قولى مين اللي بتتصل عليك دى واول ما ارد تقف السكة؟
أدهم: وانا اعرف منين؟؟
حنان: ما تعرفهاش اللي بتكلمك كل يوم في نص الليل
أدهم: لاء معرفهاش..ومش بكلم حد وسيبك بقا من اللي في دماغك دا. انتى أية مالك حصلك حاجة في راسك؟
حنان: يعنى أنا مجنونة طيب أنا هوريكى الجنان على اصوله (تتحرك بسرعة في الصالة لكى تجد شيء تضربة به لا تجد فير الكراسى ترفع كرسى كى تضرب بى يجرى من امامها داخل الفيلا.. تصرخ .. تنادى على كريمة) كريمة يا زفتة.
كريمة: (تدخل مندفعة) نعم يا مدام خير
حنان: انتى قولتيلى على بتوع الزار هاتيهم حلا.. حلا.
كريمة: حاضر يا مدام جاضر.
حنان: فاهمة حلا (تخرج من المسرح إلى داخل الفيلا)
(تتحرك كريمة وتمسك التليفون لكى تتصل.. يدخل ادهم إلى المسرح ويمسك يدها .تصرخ)
أدهم: ماتخفيش انتى هتكلمى مين؟
كريمة: هاكلم بتوع الزار
أدهم: زار أية فهمينى؟ تعالى
كريمة: حاضر
(يخرجوا من المسرح، يدخل محروس إلى المسرح يجلس ويضع رجل على رجل، يحدث نفسه بصوت مسموع)
محروس: هو كل يوم الف عليهم كدة علشان الغدا، طيب مش لا فف لما اشوف بقا هيعملوا أيه
حنان: ( تدخل متعصبة. تجده جالس، تصيح فيه) أنت قاعد كدة ليه يا حيوان
محروس: (يفزع يقف من مكانه)كنت كنت جاى اسال حضرتك هتتغدى ايه
حنان: واللى بيسأل يقعد ويحط رجل على رجل، روح اعمل اى حاجة على الغدا روح (يخرج محروس جرس التليفون تتحرك وترد عليه) الو
(صوت رجل من خارج المسرح يرد عليها..صوت صابر)
حنان: الو..مين..
صابر: صابر
حنان: ايوة مين؟؟
صابر: صابر
حنان: ربنا يقويك.. أنت مين جضرتك؟
صابر: جولتلك صابر
حنان: وانا قلتلك ربنا يقويك
صابر: مالك يا حرمة أنا صابر اخو جوزك ادهم
حنان: اهلا يا صابر بتتكلم منين؟
صابر: من حنكى من محطة الجتر
حنان: طب ما تيجى أنت مش عارف العنوان؟
صابر: عارفه هجيب تاكسى واجى توالى
حنان: مستنينك (تغلق التليفون، تنادى على محروس) محروس محروس
محروس: (يدخل مسرعا إلى المسرح) ايوة يا مدام
حنان: بقول اعمل حسابك عندنا ناس على الغدا
محروس: مين يا مدام؟
حنان: اخو البيه
محروس: صابر؟؟ ينهار اسود
حنان: اخرس يا حيوان
محروس: اخرس إيه يا مدام دول بيجوا يقعدوا بالسنة مش يومين وماشين
حنان: وانت مالك امش اعمل اللي بقولك عليه، فين كريمة؟
محروس: بتجيب الناس
حنان: ناس مين؟
محروس: (يخبط على يده كأنه يدق على رقق (دف)) بتوع الزار
حنان: اخرس صوت ما يطلعش، امشى امشى (وهو خارج يدق على يده وينظر إلى حنان،تصيح فيه) طب يا حيوان حاضر لما الضيوف يمشوا
(يخرج من المسرح..صوت كلكس من الخارج، وصوت صابر ينادى)
صابر: يا استاذ ادهم، يا خوى..اخوك صابر شرفك.. ادخل؟
حنان: اهلا وسهر أية النور دا
(يدخل صابر ومعه روحية زوجته..ومعهم هديا كثيرة.. يرميها على الارض ويصافح حنان بشدة.. يحدث روحية)
صابر: سلمى على مرات خوىا مودام حنان همى سلمى
(تهجم روحية على حنان وتصافحها بحرارة شديدة يكاد ان يغمى عليها من شدة السلام)
حنان: كفاية حرام عليكى حرام (تبعد روحية عنها وهى غير راضية من الترحيب)
صابر: (يلتف حوله وكأنه قد فقد شيء، يصيح بصوت عالى جدا) ينهار اسود هى فين راحت فين؟
حنان: هى ايه؟؟
صابر: نهار اسود
روحية: مالك يا صابر؟ راحت فين مش كانت معنا
صابر: (يلف حوالين نفسه، ويلف المسرح كله وهو يصيح..ومن خلفه روحية) يا خراب بيتك ياصابر، راح شقى عمرى الحجونى يا ناس
حنان: (تصرخ ويكون محروس واقف يلوح بيده كأنه مايسترو..يقف فجأة عندما يسمع صراخها) في إيه هو إيه اللي راح منك؟
راضية: (صوتها من خارج المسرح) الحجنى يابوى.. هموت يابوى.
صابر: بتى حببتى
روحية: راضية انتى فين يا ضنايا؟
راضية: هنا يابوى
(تدخل المسرح وهى حاملة على رأسها حقيبة كبيرة جدا.. يجرى إليها صابر وروحية، يرى محروس روحية يشعق بصوت منخفض)
محروس: ينهار اسود كل ذى راضية ولو مش راضية تبقى ايه؟
راضية: (ينزلوا من عليها الشنطة، تأخذ نفسها، تنظر إلى حنان تحدث صابر) مين ذى يا بوى؟ اها مين؟
صابر: دى مرات عملك روحى سلامى عليها. روحى (يدفعها بيده..)
(راضية تتحرك وكأنها في حلبة مصارعة، تنظر إلى حنان وتنظر إليها يلفوا حول بعضهم حتى تتمكن منها راضية وتمسكها وتبدأ في تقبيلها.صراخ مستمر حتى يدخل ادهم إلى المسرح وحنان تصرخ يتدخل ويبعد راضية عنها.. تتنهد حنان وتجلس على الكرسى تدخل كريمة مسرعة وفى يدها كوب ماء ويكون محروس واقف يهوى على حنان بفوطة. بعد ان تأخذ حنان نفسها).
حنان: مين دى؟
صابر: بنتى راضية.. سلمى على مرات عمك.. روحى..
(تصرخ حنان وتخرج من المسرح مسرعة ومن خلفها كريمة ومحروس)
راضية: هى زعلت منى ولا أية ياعمى؟
أدهم: لاء ولا زعلت ولا حاجة وحمد لله على السلامة ياخوى
(يصافحه ويقبله وراضية تقبل عمها ويجلسوا.. ينادى ادهم على محروس)
أدهم: محروس محروس
محروس: (يدخل المسرح) اامرنى يا ادهم بيه
أدهم: هات حاجة ساقعة
محروس: حاضر (يخرج)
أدهم: أية النور دا كله يا خويا
صابر: دا نورك يا ادهم.. خد يا ادهم (يخرج كيس بيه مبلغ كبير من المال ويعطيه لى ادهم.. يأخذه منه)
أدهم: أيه دا؟
صابر: ذا إيجار الأرض 20 ألف جنيه
أدهم: كويس جم في وقتهم
صابر: بجول أيه يا اخوى
أدهم: نعم نعم
صابر: هى مرتك فين؟
روحية: ايوة من ساعة ما جينا وهى مش جاعدة معنا.
راضية: أنا عايزة مرات عمى يا بوى (تدخل حنان إلى المسرح مرتدية ملابس سهرة عندما تراها راضية تصيح) الرجاصة يا بوى الرجاصة يابوى.
صابر: رجاصة أيه يا بت دى مرات عمك
روحية: مرات عمه كيف؟
حنان: كده هو كده.. واللى مش عجبه يرحل
صابر: (ينظر إلى ادهم ويقف) لحد كده ولا يا مرت اخويا نرحل
روحية: انتى بطردينا من دارك يا بنت الاصول
صابر: جوموا جوموا بينا نرحل من بيت اخويا الكبير.. الكبير اللي ضيعت علية فدانين طين..
أدهم: اهدى بس وانا هافهمك.. اهدى..
(تخرج حنان من المسرح)
أدهم: اسمع اللي ها قولك عليه.. مراتى ذى حصل عندها لطف
روحية: لطف كيف؟
راضية: يعنى هوت يا اما.. صح يابوى..
صابر: صح يا حبيبة بوكى.. طيب كده يا خوى ما تبجاش خطر عيك..
أدهم: لا..أنا اتفقت مع ناس هيعموا لها زار.. وجايين كمان شوية..
صابر: زارة.. زار يا صابر؟؟
راضية: يا حلاوة يايبوى. زار وتخلينى اهيص في ياعمى؟
أدهم: هيصى ذى ما انتى عايزة
صابر: ايوة يا خوى يمكن عقدتتها تتفك وتتجوز.. يارب..
كريمة: (تدخل مسرعة إلى المسرح) وصلوا يا استاذ ادهم وصلوا
أدهم: هما مين اللي وصلوا؟
كريمة: بتوع الزار
أدهم: خليهم يدخلوا بسرعة
صابر: حى مددا
روحية: مدد يا اصحاب الكرمات مدد
(تدخل مجموعة الزار، يبدأ الدق والزمر، تدخل حنان في وطتهم.. وروحية وراضية، وكريمة، ومحروس وادهم جمايعهم، يذكرون مع الزار، بعد انتهاء الزار، صرخة عالية من حنان، تنظر ترى ادهم واقف تصرخ)
حنان: أنت هنا اطلع برة كلكم برة (تجرى إلى خارج المسرح)
أدهم: لسه ذى ما انتى.
روحية: بقول أية يا استاذ ادهم، المثل بيقول ايه
أدهم: بيقول ايه؟
روحية: هات ليها ضرة يتصلح حالها
أدهم: بس أنا بحبها
صابر: وماله،حبها يا خوى، دى نقرة ودى نقرة
أدهم: انتم شايفين كدة؟ مفيش حل تانى؟
روحية: لاء مفيش
صابر: اعتمد على الله يا خوى واتجوز
أدهم: اتجوز بس كده، واللى هتجوزها موجودة؟
صابر: على البركة
بــــــــــــــــــــلاك
المشهـــد الثانـــــي
(يضاء المسرح على فيلا، صوت زافة قادمة من خارج المسرح، تدخل الزفة بالمزمار ويكون العريس ادهم وفى يده رحمة العروس ومن خلفه صابر وروحية وراضية ومجموعة كبيرة من المعازيم، كريمة ومحروس واقفين ينظروا ما يحدث في استغراب، بعد مدة تدخل حنان على صوت المزمار ترى ادهم يرقص هو ورحمة، تصرخ يسكت المزمار تجرى على ادهم تمسكها كريمة ومحروس ويوقفها.. تصرخ)
حنان: سبونى سبونى، أنت بتتجوز عليه؟ أنا هاقتلك
(يخرج الجميع من على المسرح، ويبقى ادهم وحنان ورحمة وصابر وروحية وراضية و كريمة ومحروس)
حنان: أنت بتتجوز عليه؟ أنا هقتلك هقتلك
كريمة: (تميل عليها وتحدثها) اهدة ياستى اهدى..بطرقة دى هينتصروا عليك
محروس: ايوة اهدى وهنشوف ليهم حل
حنان: أنا هسيب البت وامشى همشى (تخرج ويخروجا خلفها كريمة ومحروس)
أدهم: (يضحك) اخيرا انتصرت عليكى يا حنان
رحمة: مش كدة يا ادهم
أدهم: سبينى، سبينى اخلص تارى
صابر: بجول لكم أيه أنا رايح عند عمك اشوفه وانت اطلع مع مرتك
روحية: ايوة اطلع واتهنى يا استاذ ادهم
راضية: مبارك ياعمى
أدهم: عقبالك يا راضية
صابر: اجولكم سلام عليكم
(يخرج صابر وروحية وراضية من المسرح، ادهم ورحمة وحدهمان، ينظر يرى حنان تقف في مكان خفى تشاهد ما يدور، ادهم يرها واقفة تراقبهم، يمد يده لرحمة)
أدهم: اخير بقينا لوحدنا، وحشتنى
رحمة: وانت كمان
أدهم: أيه رايك نطلع فوق؟
رحمة: اللي تشوفه
(يتحركوا ويخرجوا من المسرح، تدخل كريمة وتنظر يمين ويسار لا تجد احد تشير إلى حنان بالدخول، تدخل حنان ومحروس إلى المسرح)
كريمة: طلعوا فوق
حنان: كده، كده يا ادهم تتجوز عليه؟ حاضر ان ماعرفتك
محروس: اهدى يا مدام اهدى خلينا نفكر هنعمل ايه
حنان: هتعملوا أيه عرفونى كده؟
محروس: اول حاجة لزم مايبنش عليكى انك زعلانة ومضيقة
كريمة: وتانى حاجة اظهري له حبك له
حنان: أنا أنا اظهر له حبى..أنا مش بحبه بكرة بكرة
كريمة: لاء بتحبيه.. ايوة بتحبيه
حنان: لاء مش بحبه
كريمة: خلاص حبيه. وبعدين داج وزك يعنى ومراته
محروس: ايوة مراته القديمة
حنان: قديمة أيه يا حيوان؟
كريمة: اسكت اسكت أنت خالص. اقفل بقك ذا خالص
حنان: يعنى اعمل ايه؟
كريمة: أنا هقولك تعملى ايه. تعالى جوة.
(يخرجوا جميعا من على المسرح. يدخل ادهم وهو لابس ملابس النوم، ينظر يمين ويسار لا يجدا احد يشعل سيجارة يشرب منها ويرمى الطف على الارض، يتحدث بصوت عالي)
أدهم: في حد عنده اعتراض، مش سامع صوت حد يعنى، مش لاقى حد يكلمنى ليه؟ اهو بشرب اهو برمى على ارض.
رحمة: (صوتها من خارج المسرح) أنت فين يا ادهم فينك ياحبيبى؟
أدهم: هنا يا روح قلبى
رحمة: تعال عايزاك بسرعة
أدهم: جاليك حلا
(يهم بالخروج تدخل حنان تتحرك وتنادى ادهم في دلع)
حنان: (تنادى) ادهم..ادهم..
أدهم: (ينظر يجدها حنان) بتاندى علي؟
حنان: ايوة يا دودو..ايوة يا روحى.. هو أنا ليه غيرك؟
أدهم: انا؟
حنان: أنت حبيبي يادودو
أدهم: دودو..ادهم..انتى نسيتى اسمى ولا ايه؟
حنان: لاء أنت دودو..جوزى وحبيبي ونور عينى. (يبدأ الاندماج معها)
أدهم: دودو..دودو..يا حنون
حنان: حنون، من زمان مالقلتليش حنون
أدهم: انتى؟
رحمة: (تدخل إلى المسرح ترهم على وضعهم. تصيح) الله الله يا سى ادهم.
أدهم: (يفق ويرجع كمان كان عليه) إيه في إيه؟
رحمة: ولا حاجة، أنت بتعمل إيه معاه؟
حنان: هيكون بيعمل إيه؟ ذا جوزى
رحمة: وجوزى.. أنا كمان
حنان: لو سمحتى مالكيش دعوة بيه
رحمة: نعم يا روحى مليش دعوة بمين
حنان: بيه
رحمة: ليه؟ ذى مالكى في ليه
حنان: بقولك أيه ماتطلعيش جنونى
رحمة: ما تطلعى فرجهم لى كده
حنان: اقولك إنا سيبهولك دلوقتى بس مش هاسبهولك..فاهمة مش هسيبه (تخرج من المسرح)
أدهم: حلو قوى كده.. خليكى على كده
رحمة: عجبتك؟
أدهم: انتى تعجبى الدنيا كلها.
(يخرجوا من المسرح وهم يضحكوا، تنسحب الإضاءة تدريجيا.. ويبقى ضوء خافت جدا. يدخل محروس وهو يمسك سيجارة يشرب فيها. يحدث نفسه بصوت عالي)
محروس: أحلى حاجة أنا كل يوم بعد الكل ما ينام اعمل نفسي صاحب الفيلا وأعيش في دور راجل غنى (يتحرك ويلبس رووب موجود على يده ويشعل سيجارة ويدخن فيها) ايوة كده أنا ادهم (ينادى على كريمة) أنت يا بنت يا خدامة، تعالى هنا.
كريمة: (تدخل إلى المسرح) نعم يا سعادة البيه. اامرنى..
محروس: اعمليلى شاى بسرعة، واعملى حسابك على الغدا بكرة عندنا ضيف
كريمة: ضيف؟ مين؟
محروس: أصدقائى اتعرفت عليهم في فرنسا.
كريمة: حاضر،بس هو كل يوم ضيوف ولا ايه؟
محروس: اخرسى دول اصدقائى الانتيم، امشى روحى هاتى الشاى، وبلغى المدام تيجيلى عايزها
كريمة: حاضر (ترتدي باروكة وتمسك في يدها مروحة، تتقمص شخصية زوجة محروس) نعم يا ادهم عايز أيه يا حبيبى؟
محروس: وحشتينى ياروحى، فينك؟
كريمة: موجودة يا حبت عيني من جوة، اامرنى ياضى عنيه
محروس: معقولة جمالك دا0؟ مش ممكن.
كريمة: أنت الاجمل يا روحى
محروس: إيه رأيك؟ نأخد كام يوم في السخنة؟
كريمة: حبيبى معاك في اى مكان أنت فيه
محروس: خلاص اعملي حسابك على كده
كريمة: حاضر، أنت عايز منى حاجى دلوقتى
محروس: شكرا يا روحي.
كريمة: عن اذنك (تخرج)
محروس: (وحده على المسرح، يحدث الجمهور) فيها إيه لو كلنا بقينا كده لو للحظة صدقونى مش هيكون في محاكم ولا زعل ولا اى حاجة تعكنن علينا حيتنا، اقول لكم تصبحوا على خير بكرة يوم طويل محضرين حجات كتيرة للعروسة، تصبحوا على خير (يخرج من المسرح)
بـــــــــــــــلاك
(صوت موسيقى، مع آذان الفجر.. يضاء المسرح مرة أخرى )
كريمة: (تدخل إلى المسرح على صوت رنت التليفون، تحدث نفسها بصوت عالي) يا فتاح يا عليم يا رزاق يا كريم يا رب. اصتبحنا على التليفونات على الصبح (ترد على التليفون،صوت صابر)
صابر: الوه.. ادهم
كريمة: لاء أنا كريمة
صابر: كريمة الخدامة
كريمة: ايوة الخدامة.. مين أنت؟
صابر: صابر اخوا الاستاذ ادهم
كريمة: نعم يا سى صابر
صابر: بلغى اخوى الاستاذ ادهم انى هسافر حلا للبلد يومين وراجع تانى
كريمة: طيب
صابر: وبلغيه انى سايب المرة والبت عند عمى
كريمة: طيب في حاجة تانية؟
صابر: وبلغيه مايجلجش عليه
كريمة: طيب في حاجة تانية؟
صابر: وبلغيه سلامي أنا وكل الاسرة واهل البلد جميعا
كريمة: طيب مع السلامة (تغلق التليفون)
صابر: وبلغيه كمان ان…
كريمة: (تفزع) ينهار اسود هو بيتكلم منين ذا؟
صابر: من حنكى.. اجول بالسلامة..
كريمة: يا خرابى..صحيح مفيش حاجة غلبت الصعيدى (تهم بالحركة صوت جرس التليفون) وبعدين في اليوم دا (تتحرك وترد) الو.. ايوة..(تتحدث بهمث) ايوة يا مدام راشا كل حاجة جاهزة.. جايين.. بالسلامة ايوة تمام.. مع السلامة (تخرج مسرعة من المسرح)
(يدخل ادهم وفى يده رحمة.. يضحكوا)
رحمة: كمان واحدة يا أدهم
أدهم: بيقول كان مرة
(يدخل محروس إلى المسرح، وفى يده ورقة وقلم)
أدهم: ايوة يا محروس، في حاجة؟
محروس: كنت جاى اسال حضرتك
حنان: (تدخل إلى المسرح وتجلس، تنادى على محروس) محروس،تعال عندى
محروس: حاضر يا مدام (يتحرك إلى حنان) امرك يا مدام
حنان: أنت هنا ليه؟
محروس: كنت جاى اسال هتتغدوا أية النهاردة؟
حنان: وماجتش عندى جوة ليه
محروس: كنت جايلك بس قلت اشوف ادهم بيه الاول
حنان: طيب عموما أنا هتغدى شربة خضار
محروس: تمام حاضر
حنان: روح للبيه شوفوا هيتغدا ايه
محروس: حاضر عن اذنك (يتحرك إلى ادهم) حضرتك هاتتغدى ايه؟
أدهم: اللي تأمر بيه حبيبتي..تتغدى أيه يا حببتى
رحمة: أنا عاملة رجيم علشان جسمى، خايفة اتخن ياحبيبى
أدهم: فيها إيه ومهما كان شكلك او جسمك انتى حببتى
رحمة: مرسى يا روحى
محروس: ايوة حضرتك هتتغدوا ايه؟
أدهم: أنا مكرونة وبانية.. وحببتى هاتاكل ذى ما هاكل
رحمة: بعد اذنك يا روحى هزود حاجة بسيطة كمان
أدهم: أيه سلاطة
رحمة: اها سلاطة خضار ودكر بط سمين وفرختين وفخدة ضانى..
محروس: أيه ايه؟
رحمة: اعمل اللي قلتلك عليه..دا كله اكل رجيم.. روح حضر الغدا
محروس: (يحدث نفسه خارج من المسرح) رجيم أيه ذا؟ ذى لو قعدت هنا اسبوع هتكلنا
كريمة: (صوت جرس الباب، تخرج وتفتح الباب، صوتها من خارج المسرح) مدام رشا، ومدام احلام ومدام نادية ومدام رجاء، يا مدام حنان
حنان: خليهم يدخلوا
أدهم: (يقف) هى أيه ما صورة المدمات دى؟ كدة يبقا؟؟ مدام كده اطلع أنا برة
حنان: خليك ياحبيبى،أنت غريب؟؟ أنت جوزى
(يدخلوا خلف بعضهم إلى المسرح، يقبلوا حنان)
حنان: معقولة أيه المفاجأة ذى يا جماعة مش تقولوا انكم جايين؟
رشا: اعتبرى اننا قولنا هتعملى ايه؟
حنان: على الاقل اعمل حسابى على الغدا
أحلام: يا حببتى احنا نجى في اى وقت
نادية: اها احنا اصحاب مكان ياروحى
رجاء: ايوة طبعا
رشا: (تشير على رحمة) مين ذى يا ادهم الشغالة الجديدة؟
أدهم: الشغالة؟
رحمة: لاء يا روحى أنا المدام الجديدة
أحلام: إيه ذا جبتها منين ذى يا ادهم؟
نادية: مفيش منها حريمى؟
رحمة: في يا روحى هتتقطع على راسك حالا
حنان: إية الكلام ذا؟ احترمى ضيوفى
رحمة: لما يكونوا محترمين احترمهم بس هما مهزقين.
رشا: اخرسي انت عارفة بتكلمى مين؟
رحمة: مين يا عنية؟ مين ياروحى؟
رشا: أنا مدام
رحمة: (تتحرك إليهم) طالما مدام يبقى لزم تتعلمى الادب وازاى تكلمى الناس باحترام.. يعنى إيه الكلام ذا؟ يعنى تعالى بقى واعرفك إيه الكلام ذا (تهيج فيهم جميعا وتضرب فيهم وتمسك مقشة وتجرى خلفهم وتكون معهم حنان.. تدخل كريمة على المسرح تضربها كذلك معهم.. جميعا حتى تخرجهم جميعا وتبقى كريمة وحنان.. ويكون محروس وادهم واقفان يراقبون ما يحدث من بعيد) تعالى هنا
حنان: نعم
رحمة: أنا هنا ست البت فاهمة؟
حنان: ايوة
رحمة: ادهم جوزى وجوزك وأنا بحب العدل..يوم عندى ويوم عندك
حنان: لاء خالية ليكى
رحمة: قلت لاء.. فاهمه؟
حنان: حاضر فاهمة.. فاهمة..
رحمة: ودلوقتى ادخلى جوة .. ادخلى.. (تدخل حنان إلى الداخل وخلفها كريمة ترى محروس واقف تحدثه) وانت واقف كده ليه ادخل شوف شغلك.. ادخل (يدخل محروس مسرعا إلى الداخل) حبيبى راضى عنى؟
أدهم: راضى بس انتى حببتى (يحضنها)
بــــــــــلاك
المشهـــد الثالــث
(يضاء المسرح على بهو الفيلا يكون جالس ادهم وصابر)
أدهم: يعنى سافرت وجيت؟
صابر: ايوة يا خوى
أدهم: واهل البلد عاملين ايه؟
صابر: كويسين…بقول يا ادهم ياخوى
أدهم: نعم
صابر: أنا احترت في البت بنتى دى مفيش حد بيقدم لجوزها خالص
أدهم: يا صابر لسه النصيب ماجاش..اصبر وفرج ربنا قريب.
رحمة: (تدخل إلى المسرح وفى يدها ( شبش )) حبيبى معلش اتاخرت عليك
أدهم: لا ابدا ياحببتى..مفيش تاخير..
رحمة: (تجلس تحت قدمه وتهم بتخلع له الحذاء، يشد رجله) استنى حنان بتبص علينا (يمد رجله ليها، تخلع له الحذاء وتلبسه (الشبشب)) حبيبى مش عايز حاجة تانية؟
أدهم: شكرا يا حببتى
حنان: (تخرج رحمة من المسرح،تدخل هي إلى المسرح وتتجه إلى ادهم، تقف أمامه) مش عايز حاجة يا ادهم؟
أدهم: شكرا.. كنا بنقول أيه يا صابر؟
حنان: يعنى مش عايز اعملك حاجة؟
أدهم: شكرا.. كمل
حنان: يعنى امشى؟
أدهم: اتفضلى، ولا اقولك هاتى كوباية ماية.
حنان: حاضر بس كده؟ (تخرج من المسرح)
صابر: مالها يا ادهم؟
أدهم: هات ليها ضرة ينصلح حلها
صابر: ايوة يا ولد ابوى، ضرة ينصلح حلها.. بس مش كل الحريم يا بوى
(تدخل حنان إلى المسرح وفى يدها كوب ماء تتجه إلى ادهم، تدخل رحمة إلى المسرح وتقف وتنظر إلى ادهم)
رحمة: مش عايز حاجة يا ادهم؟
أدهم: كنت عايز اشرب حنان جابتلى اشرب شكرا ياحببتى
رحمة: واجب عليها أنت جوزها وخدمتك واجب
أدهم: طيب إحنا خارجين، عايزين حاجة؟
رحمة: لاء شكرا
صابر: زمان راضية وروحية جايين مالكمش بركة غيرهم
حنان: حاضر يا حاج صابر
أدهم: يا له يا صابر
(يخرجوا من المسرح،تجلس حنان في جهة وتجلس رحمة في جهة اخرى، يدخل محروس وكريمة خلفه يقفوا بجوار حنان، تشير رحمة إلى محروس بيدها. يحضر اليها مسرعا)
محروس: نعم، نعم اامرينى
رحمة: اعمل حسابك في ضيوف جاين على الغدا
محروس: حاضر
رحمة: اعمل احسن حاجة عندك
محروس: حاضر
رحمة: مفهوم
محروس: مفهوم يا مدام
رحمة: وانت تعالى هنا (تشير لى كريمة تحضر اليها بسرعة)
كريمة: اامرينى يا مدام
رحمة: عايزة الفيلا دى تبقى مرايا في نص ساعة. فاهمة؟
كريمة: ايوة فاهمة
رحمة: مش عايزة اشوف وش حد فيكم، برة (يخرجوا مسرعين من المسرح، تحدث حنان) وانت هتفضلى قاعدة كده؟
حنان: أنا؟
رحمة: ايوة انت قومى شوفى اى حاجة اعمليها
حنان: حاضر
(جرس الباب يدق)
رحمة: شوفى مين على الباب
حنان: أنا؟
رحمة: ايوة انت. بسرعة
(تخرج حنان مسرعة من المسرح، صوت روحية من خارج المسرح)
روحية: انت اللي بتفتحى الباب؟ (تدخل وراضية ومن خلفهم حنان) هو مفيش هنا شغالة؟ بتفتحى انت الباب
حنان: أيه النور ذا منورة يا ام راضية.اتفضلى (تصافحهم وتحتضنهم)
رحمة: وحشتونى
راضية: انتى اكتر يامرت عمى
روحية: منورة يا ست حنان
حنان: منورة بيكم اهلا وسهلا اتفضلوا
راضية: وانتى يا مرت عمى يا جديمة مش هاتجعدى
حنان: حاضر يا روح مرات عمك. هقعد
رحمة: تقعدى فين روحى شوفى اللي هتعمليه
حنان: حاضر عن اذنكم (تخرج من المسرح)
روحية: أيه اللي بتسويه ذا مع حنان؟
رحمة: اسكتى هافهمك بعدين
روحية: ايوة أنا فاهمة بس بالراحة شوية مش كده
راضية: عايز اكول يامرات عمى
رحمة: على عيني يا حببتى هانتغدى كلنا حالا
(يدخل صابر وادهم إلى المسرح، عندما تراهم راضية تجرى اليهم وتحتضن صابر)
راضية: بوى وحشتنى يا بوى، وحشتنى
صابر: ماتشوفيش وحش يابتى
راضية: جعانة يا عمي
صابر: حاضر بس كده (ينادى على كريمة) جهزى الغدا يا كريمة، تعالوا نتغدى
(يخرجوا جميعا، تدخل حنان إلى المسرح في انكسار، تجلس وتتذكر ما كان يحدث بينها وبين ادهم، تتحدث بصوت مسموع)
حنان: أنا اللي دمرت حياتى بايدى، ايوة، أنا، من بعد ما اتجوزنا وانا كنت مش مريح ادهم كان ديما اتخانق معاه
أدهم: (بقعة ضوء عليه واقف يحدث الجمهور) حنان ذى كانت بالنسبة ليى حلم كانت ايام الخطوبة احسن ايام عمرى ولحد النهاردة كل ما افتكرها احس انى ماكنش حد في الدنيا في سعادتى، كنت لما اروح اقبلها، كأنى رايح ارجع روحى لنفس لحد ما اتجوزنا، خناق وزعيقن على طول
(تكون حنان واقفة تحدث نفسها وكأنها تقف امام ادهم وترد عليه)
أدهم: على طول خناق خناق..ليه؟؟
حنان: مش عارفة
أدهم: كان نفسى نفضل زاى ما كنا.. إيه اللي حصل؟
حنان: مش عارفة
أدهم: كنت ديما مشغول في شغلى، يمكن ذا السبب؟
حنان: مش عارفة
أدهم: كنت بسهر كتير هو ذا السبب؟
حنان: مش عارفة
أدهم: كان نفسى اخلف منها، يمكن ذا السبب؟
حنان: مش عارفة
أدهم: يكون إيه السبب؟
حنان: مش عارفة
أدهم: وأنا كمان مش عارف، لاء عرفت، يمكن يكون اتحسدنا؟ الحسد مذكور
حنان: مش عارفة
أدهم: طيب اعمل إيه؟
حنان: مش عارفة، مش عارفة، مش عارفة
أدهم: طب ليه لما اتجوزت بقت احسن من الاول؟
حنان: برضوا مش عارفة مش عارفة
(يضاء المسرح ويكون واقف صابر وروحية ورحمة)
صابر: مالكم في إيه؟
أدهم: تعب يا صابر
حنان: من إيه؟
أدهم: من حياتى
حنان: لو أنت مفكر ان الدنيا كلها حلو تبقى غلطان
صابر: ولو مفكر انها وحشة برضوا تبقى غلطان
أدهم: والحل إيه؟ ليه لما بنكون كويسين بنحاول نبقى وحشين مع بعضنا..كل حاجة بالحب كويسة
روحية: هو فين الحب ذا؟ جوانا عندى وعندك وعندنا كلنا
أدهم: سهلة كلمة حب بس صعبة في تنفذها
حنان: الصعب يبقى سهل برضوا بالحب
رحمة: قول كلمتك يا صابر
صابر: هجول إيه ولا إيه ولا إيه.. الجول ضايع مع ناس مش بتحبك ولا بتحب مصلحتك، بس لو حبينا بعضنا هنبقى احسن ناس في الدنيا
ادهم: صح يا ابو راضية، أنا بحبك جوى حصل إيه؟ ولا حاجة، صح؟
صابر: صح..والصح كمان لزم كل واحد يعترف بغلطة
ادهم: أنا غلط في حق حنان مراتى حببتى، لما تشغلت عنها، هى ليها حق عندى وأنا ليه حق عندها، ولو كل واحد عرف اللي له واللى عليه كلنا هنستريح.
صابر: وأنا غلط في حق ادهم كان لزم اهدى شوية وما اضغتش علية اكتر من كده..حقك عليه يا ادهم ماتزعلش
رحمة: وانتى سمحينى على اى حاجة عملتها معاكى
ادهم: وانتم كمان سامحونى
حنان: وانتى نسمحك ليه؟
رحمة: علشان أنا مش مراته
الجميع: (في صوت واحد ويكون واقف ادهم مبتسم) نعم مش مراته
رحمة: لاء، أنا رحمة اخته من امه
حنان: لوزاي اتجوزتوا؟
رحمة: جانى في يوم مخنوق ومضايق جدا عن كل مرة، بقوله مالك حكالى اللي بيحصل وكان مصمم على الطلاق كان عايز يطلق حنان، قولت له لاء اصبر، سمع الكلام لحد ما قابل ناس طلعوا في دماغه انه يتجوز، عارفاهم انا الناس ذى، جه وقالى عرضت علية انى اعمل مراته، وافق قلت له لو اتصلحت ورجعت عن اللي في دمغها
صابر: خلاص يا دار ما دخلك شر لو ما رجعت شذى الأول
أدهم: اتجوز. واتجوز اختى واختى رجعتلى مراتى حببتى
صابر: وانتى اخته منين انا اخوه
رحمة: اخته من الام ومفيش حد يعرف كده غير ادهم
حنان: يعنى كل ذا كان تمثلية عليه؟
رحمة: ايوة وجابت نتيجة
أدهم: مين قال لكم انها جابت نتيجة؟
رحمة: يعنى ايه؟
حنان: يعنى مش عايزة اشوف حد فيكم هنا.. أنا هنا
الجميع: (في صوت واحد) يعنى ايه؟
حنان: يعنى أنا مراتك واختك وحببتك وكل حاجة
أدهم: حببتى يا مراتى
حنان: حبيبى يا جوزى
(يحتضنوا بعضهم)
بـــــــــــــــــــلاك
النهايـــــــــة
| الاسم | شخصيات العمل |
| ادهم | الزوج، في الاربعين من عمره طيب القلب جدا حنون على الجميع، من الاثرياء |
| حنان | زوجة ادهم، عصبية جدا، في الثلاثين من عمرها |
| رحمة | اخت ادهم من الام، قوية شجاعة في نفس سن حنان |
| صابر | اخو ادهم الصغير يعيش في وجه قبلى من الرجال الشديدة |
| روحية | زوجة صابر في نفس سن حنان، صعدية قوية وشدية بشخصييتها |
| راضية | بنت صابر في العشرين من عمرها، عقلها عقل طفلة |
| كريمة | خادمة عند ادهم ، في العشرين من عمرها |
| محروس | خادم عند ادهم في الثلاثين من عمره |
| رشا | صديقة حنان ونفس سنها تقريبا |
| احلام | صديقة حنان ونفس سنها تقريبا |
| نادية | صديقة حنان ونفس سنها تقريبا |
| رجاء | صديقة حنان ونفس سنها تقريبا |